Pagbinaisay ang ginapahayag nga ginatudlo nga motibo sa natabo nga pagpanglabo-patay sang kaugalingon nga utod sang biktima nga magapapili kuntani sa pagka-alkalde sa banwa sang Dumalag.
Sa interview sang Bombo Radyo kay PCPT Jaypee Silvestre, hepe sang Dumalag MPS, ginpahayag base sa imbestigasyon sang mga ini may madugay na nga hiligut-anon ang magtimbang nga bahin.
Dugang pa sini, nagpalagyo pa ang suspek nga utod sang biktima matapos nakumiter ang krimen apang pagkatapos sang duha ka oras, nag surrender man ini sa isa ka barangay official kag gilayon naman ini nga gindala sa talatapan sang mga kapulisan.
Matandaan nga ginkilala ang biktima kay Jose Sonny Felarca, 60-anyos samtang ang ginatudlo naman nga suspek ang iya mismo kaugalingon nga utod nga si Walter Felarca, 58-anyos kag lunsay mga residente sang Barangay Duran sa nasambit nga banwa.
Nag-angkon sang patal nga pilas sa ulo kag iban pa nga parte sang iya lawas ang biktima nga gintunaan sang iya kamatayon.
Sa karon, yara pa ang bangkay sang biktima sa isa ka punerarya sa nasambit nga banwa samtang ang suspek ang yara na sa kustodiya sang Dumalag MPS para sa nagakaigo nga disposisyon.
