Posible nga magamit sang mga kritiko ni Presidente Rodrigo Duterte bilang balasehan sa pagpasaka sang impeachment complaint ang pagkakas sini sa Philippine National Police (PNP) sa anti-drug operations kag gintugyan sa Philippine Drug Enforcement Agency ukon PDEA.
Ini ang pahayag ni Atty. Nelson Borja, Capizeño criminal lawyer sa interview sang Bombo Radyo.
Suno kay Borja, ang pagkakas sa PNP sa anti-drug campaign ang mangin rason agud indi mangin epektibo ang RA 9165 ukon Comprehensive Dangerous Drugs Act of 2002 bangud indi masarangan sang PDEA ang trabaho.
Paathag sang abogado, sa tion nga indi mapatuman sang husto ang nasambit nga layi, sarang nga basulon ang presidente bangud ini ang iya ginsumpaan kag responsibilidad.
Pananglitan nga matabo ini, posible suno sa iya nga ipasaka kay Duterte ang betrayal of public trust kag culpable violation of the Constitution nga makabig impeachable offense.
