ROXAS CITY – Ginkumpirma sang mga residente sang Barangay Libas, sining syudad nga may mga pulis nga nagpadulong sa ila barangay kag ginpangita ang ginakabig gabunan nga kawatan nga si Kent Advencer Villanueva, 17-anyos sang amo nga lugar.
Ginpahayag ni Reynaldo Bocala ginkakibot sini sang nahibaluan sa iya tiya nga posible nakapalagyo si Villanueva nga yara sa kostodiya sang Roxas City PNP bangud sa presensiya sang kapulisan nga nagapangita sa nasambit nga menor de edad.
Aminado si Bocala nga naalarma ini sang nakalab-ot sa iya ang impormasyon, bangud masami nga ginakawatan ang ila balay sang menor de edad sang yara pa ini sa ila barangay.
Suno naman sa tiyo ni Villanueva nga ginsugiran ini sang magulang nga nakapalagyo ang ila hinablos.
Aminado man ini nga may nakita nga mga pulis sa guwa sang ila kudal apang sadto nga mga inoras, wala ini sang ideya kun ano ang ila tuyo sa pagpadulong sa lugar bangud pagkahapon pa siya ginsugiran sang iya magulang angut sa pagpalagyo ni Villanueva sa presuhan
Samtang nagpamalibad naman si Norminda Cortez, tiya ni Villanueva nga kumpirmahon ang pagpalagyo sang hinablos.
Apang nagpasalig ini nga pananglitan nga makita sini ang hinablos, ila ini idul-ong sa Roxas City PNP.
Sa pihak nga bahin sang ginpadulungan naman sang Bombo News Team ang Roxas City PNP, nakit-an nga yara sa sulod sang karsel ang menor de edad.
Apang nagpamalibad nga magpa-interview si Police Lt. Col. Ricardo Jomuad, hepe sang Roxas City PNP angut sa isyu, bangud suno diri nga nakita man nga yara sa ila kostodiya si Villanueva kag wala nakapalagyo.
Nagpaathag man ang menor de edad ng wala ini nagpalagyo kag apat na ka bulan sa sulod sang presuhan.
