ROXAS CITY – Ginsabat karon sang gobernador sang probinsiya sang Capiz ang pagpahamtang kay Dr. Edwin Monares bilang provincial administrator.
Ginpahayag ni Governor Esteban Evan Nonoy Contreras nga wala ini sang nakita nga malain sa pag-appoint kay Monares bangud more than qualified ini sa posisyon kag daku ang mabulig sa pagdumala sini sa probinsiya.
Ginapanindugan sang opisyal nga nasentro karon sa responsibilidad sini sa mga pumuluyo nga luyag na sang pagbag-o ang plano sang iya administrasyon.
Naghinyo man ini sang pag-intiende kag kooperasyon sa mga pumuluyo nga buligan ini nga malab-ot ang handum para sa probinsiya.
Aminado man ang gobernador nga indi niya ma-please ang tanan kag sa gihapon may yara sang ma-criticize sa iya.
Ginpasalig man sini ang publiko nga pananglitan indi magperform sang maayo ang ginpahamtang nga provincial administrator, handa niya ini nga pahalinon.
Kun tan-awon suno sa gobernador nga daku ang ginabaton ni Monares sa ginahatag nga consultancy services kag gamay lamang ini sa ginatanyag sa iya sang gobyerno probinsiyal.
Apang sa kagustuhan nga makabulig, ginbaton sini ang offer para maplastar sa ensakto ang pagdumala sa probinsiya.
