ROXAS CITY – Pinamilya nga problema ang ginalantaw motibo sang pagluthang patay sa 37-anyos nga anay ex-convict kag barangay tanod sa Barangay Sinabsaban Cuartero Capiz.
Ginkilala ang biktima nga si Relic Estorque, residente sang nasambit nga lugar.
Nagaguwa sa inisyal nga imbestigasyon sang Cuartero Municipal Police Station nagaisahanon sa ila puluy-an ang biktima sang ginsulod ini kag ginluthang-patay sang wala makilala nga suspek.
Mahibaluan nga nakita na lamang ni Wilfredo Estorque, amay sang biktima ang biktima nga nagahuray-ad na sa ila nga panimalay kag nagapaligo sa kaugalingon nga dugo.
Gindala pa sa Senator Gerardo Roxas Memorial District Hospital ang biktima apang gindeklarar nga dead on arrival sang doktor.
Narekober sa ginluntaran sang krimen ang walo tanan ka mga empty shell kag isa ka bala sang ginapatihan 9mm pistol.
Sa interview sang Bombo Radyo kay Punong Barangay Ernie Dichosa Sr., nga duha ka tuig pa lamang ini nagapanerbisyo bilang tanod sa ila barangay.
Suno kay Dichosa nga wala man ini konta sa ila nga lugar apang nabilanggo ini sa sulod sang 16 katuig sa kaso nga discharge of firearms, attempted homicide kag robbery apang ginhilway man ini sang tuig 2018.
Dugang pa sang opisyal nga nakaangkon man sang kinagamo sa tunga sang biktima kag pamilya sini sang una matapos nga gintiro ni Relic ang iya sini nga bayaw apang gilayon man sila nahusay.
Sa karon, nagapadayon ang hot pursuit operation nga ginapatigayon sang mga kapulisan agud nga matumod ang suspek nga nagpatay sa biktima.
