ROXAS CITY, CAPIZ- Tuman ka importante kun kabigun sang Chairperson sang Committee on Health nga si Dr. Cesar Yap Jr., ang pagpahamtang sang mga Automated External Defibrillators (AEDs) sa tagsa ka mga ambulansya sa probinsya sang Capiz.
Sa interview sang Bombo Radyo, iya ginpahayag nga ang amo nga machine ang makahatag gid sang dako nga bulig sa mga pasyente nga nagakinahanglan sang gilayon nga pag-revive sang kabuhi.
Dugang pa sini, mas maayo kun ang tagsa ka ambulansya may kasubong sini nga kagamitan agud nga mas madasig nga mahatag ang kinhanglan sang pasyente.
Ang Automated External Defibrillators (AEDs), isa ka portable nga medikal nga aparato nga ginagamit agud mabalik ang normal nga pitik sang corazon sang isa ka tawo nga nakaeksperyensya sang hinali nga pag-untat sang pitik sang corazon ukon cardiac arrest.
Ginagamit ini agud nga maghatag sang de-kuryente nga shock sa corazon pamaagi sa pagbutang sini sa dughan sang pasyente.
Madamo na man suno kay Doc. Yap ang sa karon ginahanas sa pag-operate sang amo nga machine agud sa tion nga mabutangan na ang mga ambulansya, mahimo na ini nga maggamit sang insigida kun may nagakinahanglan.
Nahibaluan nga ang amo nga lihok, ang sa karon ginaduso bilang isa ka Resolution nga ginatawag ‘Resolution for the Implementation of Automated External Defibrillators (AEDs) in Ambulances’ sa Office of the Sangguniang Panlalawigan.
Pahayag ni Doc. Yap, maayo gid ang ini nga ginaproponer nga lihok para sa tagsa ka mga pumuluyo nga Capiznon, ilabi na sa mga pasyente kag ginapangabay pa sini nga kuntani mag-abot pa sap unto nga indi lang sa tagsa ka ambulansya ang mabutangan kundi pati man sa pila ka mga establisyemento sa probinsya.
Nagapangabay naman si Doc. Cesar Yap, nga ang amo nga resolution ang mahatagan sang nagakaigo nga igtalupangod kag mapatuman para sa ikaayo sang tagsa-tagsa sa probinsya sang Capiz.
In an interview with Bombo Sunnie Mae Constantino Batencila
