CAMBODIA – Nagsulod na sa ikaduha nga semana ang mabaskog nga engkwentro sa tunga sang Thailand kag Cambodia, matapos nga ginpabutyag sang gobyerno sang Cambodia nga nagalapad pa gid sa ila teritoryo ang pagbomba sang Thailand nga nakaabot na sa mga lugar nga malapit sa mga evacuation camp sang mga residente nga una na nga nagpalagyo halin sa border areas.
Sa interview sang Bombo Radyo kay Bombo International Correspondent Jennifer Togueran sa Cambodia, ginpahayag sang Cambodia’s Ministry of Defense kag Ministry of Information nga duha ka bomba ang ginbubo sang mga Thai F-16 fighter jet malapit sa mga kampo sang mga internally displaced persons (IDPs) sa Chong Kal district sa Oddar Meanchey province kag sa Srei Snam district sa Siem Reap province.
Suno kay Togueran, ginsiling sang mga otoridad sang Cambodia nga ang pagbomba sa Srei Snam, nga sobra 70 kilometro sulod sa teritoryo sang Cambodia ang nakatupa sa isa ka taytay, nga naghatag sang mabaskog nga kahadlok tungod sa kalapit ini sa mga temporaryo nga puluy-an sang mga nag-evacuate nga sibilyan.
Nahibaluan nga ang Siem Reap kilala bilang puluy-an sang Angkor Wat nga templo nga complex, isa ka UNESCO World Heritage site kag pangunahing destinasyon sang turismo sang Cambodia, gani mas naglala pa ang kahadlok sa posible nga mas lapad nga epekto sang mga opensibang militar.
Nagpahanumdom man ang natungdan sa mga kaangay niya nga Overseas Filipino Worker sa Cambodia nga maghalong bangud sa pamahog sa seguridad sa pungsod.
