ROXAS CITY – Nagapadayon sa karon ang imbestigasyon sang Pontevedra Municipal Police Station sa natabo nga pagpanghold-up sa isa ka lending collector sa Barangay Binuntucan, Pontevedra, Capiz.
Ginkilala ang biktima nga si Ronaldo Alcazaren, 22-anyos residente sang Sitio Catmon, Barangay Navitas, Panay, Capiz.
Mahibaluan nga nagaguwa sa imbestigasyon sang mga kapulisan nga samtang ginasubay sang biktima ang dalan sakay sa iya motorsiklo, ginbangaan ini sang tatlo ka mga persona nga nagasuksok sang face masks kun sa diin ang isa diri ang nagasuksuk sang long sleeves nga nagaduag pula.
Nataban sang mga kawatan ang back pack sang biktima nga may unod nga mga kagamitan kag kwarta.
Kalakip sa mga nataban amo ang isa ka tablet, wallet nga may unod nga P1,000 nga cash, kag ginbulubanta P50,000 cash nga iya koleksiyon.
Suno kay Punong Barangay Alfonso Dilla, nakaangkon pa sang pilas sa magkatuhay nga porsyon sang kalawasan si Alcazaren matapos nga gintuyo sini nga lagson ang mga kawatan.
Ginapahayag nga ginkuha pa ang motorsiklo sang biktima kag ginhulog sa banglid agud indi madali-dali sang lagas ang mga kawatan.
Ginkompirmar man sang kapitan nga ini na ang ikaduha ka beses nga may nabiktima sang hold-up sa nasambit nga lugar.
Indi naman mapat-od ni Dilla kun residente sang amo nga barangay ang mga suspetsado.
