DINGINAN, ROXAS CITY – Nakalab-ot na sa talatapan ni Punong Barangay Illuminado Corros Jr. sang Barangay Dinginan, nga isa ang iya BPAT member sa mga nagkastigo sa isa ka seaman nga ginapahayag nasal-an nga makawat sa Sitio Sentro, Barangay Dinginan, Roxas City.
Matandaan nga ginkilala ang nagreklamo kay alyas “Robert”, 42-anyos kag residente sang Alba Village, Brgy. Dinginan, samtang ang ginatudlo nga nagpangkastigo ang ginkilala kanday alyas “Ruben” kag alyas “Joemarie”, lunsay yara sa legal nga pang-edaron, kag residente sang nasambit nga lugar.
Sa interview sang Bombo Radyo kay PB Corros, nga base sa iya pagpangusisa ginapahayag nga nakita sang isa sa mga residente nga may yara sang isa ka indibidwal nga nagabantay kag kaangay nga nagalingling sa ila kudal kabangdanan nga iya ini ginguha agud kuntani komprontahon sa pagdumdum nga isa ka makawat.
Suno kay Corros, matapos makit-an sang tagreklamo nga may nagapalapit sa iya hinali niya sini ginbilin sa kilid sang dalan ang iya bike nga ginasakyan kag nagpalagyo sa lugar.
Mahibaluan nga sadto nga tion naga-bike ang biktima nagikan sa highway sang Pueblo de Panay padulong sa ila puluy-an apang bangud gulpi nga nagsakit ang iya nga tiyan, nagpondo ini kag nagpwesto sa isa ka lote agud kuntani nga magpamuhin apang hinali naman nga nag-abot ang isa ka traysikol sakay ang tatlo ka persona kag nagpalapit sa iya kag nag-akusa nga nagapangawat sang manok.
Pahayag pa sang biktima nga ginpatup-an pa siya sang inumol sang mga ini kung sa diin nag-angkon sang gaub sa iya mata kag pagpalanakit sa iya lawas.
Bangud sini, natalana nga istoryahon sang Punong Barangay ang magtimbang nga bahin agud hibaluon ang tagsa-tagsa ka mga detalye kag mahatagan sang sabat.
