Target sang Bureau of Customs nga magpatigayon sang “competitive” kag transparent nga pagsubasta sang luxury cars sang mga Discaya sa Nobyembre 15.
Suno kay Customs Commissioner Ariel Nepomuceno, ang minimum nga makuha sang gobyerno gikan sa bidding proceeds ang posible sa minimum nga P200 million tubtub P220 million.
Una na nga nagpasaka sang imbestigasyon ang BOC angut sa posible pagkadalahig sang ila kaugalingon nga personnel sa kaso sang luxury cars sang mag-asawa nga Discaya matapos naka-agi ang mga ini sa Customs nga wala sang nagakaigo nga mga dokumento.
Samtang, bilang kabahin sang nagapadayon nga reporma, nagsumiter sang report ang Customs sa Independent Commission for Infrastructure (ICI) nga nagarekomendar sang pagpasaka sang reklamo batuk sa masobra napulo sang ila mga empleyado.
Matandaan nga sa 30 ka luxury cars sang mga Discaya, 13 diri ang gin-isyuhan sang warrant of seizures kag detention bangud sa kakulang sang nagakaigo nga mga dokumento kaangay sang import entry ukon certificate of payment. Samtang 17 naman ang natukiban nga may import entry kag certificate of payment apang ginmanduan nga magpaidalom sa post-clearance audit.
