Gintawag sang No To PUV Phaseout Coalition nga “papogi lang sang gobyerno” ang mando ni Ferdinand Marcos Jr., nga i-suspende ang pagsaka sang pamasahe.
Sa interview sang Bombo Radyo kay Elmer Forro, Lead Convenor sang No To PUV Phaseout Coalition, iya ginpahayag nga ang gulpi nga desisyon sang gobyerno nagapakita sang kakulangan sang klaro kag konkreto nga solusyon sa problema.
Suno sa iya, nagalab-ot na sa P1,000 ang nadula sa kita sang mga driver bangud sa sunod-sunod nga pagsaka sang presyo sang krudo nga yara na na sa halos P50 nga pataas sa kada litro.
Bangud sini, madamo nga driver ang napilitan nga temporaryo nga mag-untat sa pagbyahe.
Dugang pa niya, indi lang dapat mga driver ang makabaton sang subsidiya kundi pati ang tanan nga pumuluyo, bangud tanan apektado sa pagsaka sang presyo sang mga balaklon.
Samtang, nagpatigayon sang transport strike ukon untat-biyahe kag protesta ang No To PUV Phaseout Coalition Panay sa padayon nga pagsaka sang presyo sang gatong.
Magapadayon ang welga subong nga adlaw tubtob buwas, halin alas-6 sang aga tubtob alas-6 sang gab-i.
