Nagpaandam ang local airlines nga may yara sang epekto sa pasahe sa eroplano ang pagsaka sang mga balayaran sa paggamit sang mga pasilidad sa Ninoy Aquino International Airport (NAIA).
Ini ang ginkumpirmar sang Department of Transportation (DOTr) kung sa diin ang landing kag take-off fees nga pagasukton sa airlines nga nagagamit sang NAIA ginpasakaan sumugod Oktobre 1, 2024.
Suno kay Transportation Secretary Jaime Bautista, ang nasambit nga pagsaka sa pagsuluktan wala nagakahulugan nga magataas man ang airfares kag posible suno diri nga i-absorb sang airlines ang kabahin sini ukon ipasa ang balor sa mga pasahero.
Sa pihak sini, ginsiling ni AirAsia Philippines head of Communications and Public Affairs Steve Dailisan nga maid-id nga ginatun-an sang airline ang posible operational impact sang bag-o nga airport fees.
Samtang, ginsiling naman sang Cebu Pacific nga ang pagsaka sa landing kag takeoff fees sa NAIA, maka-apekto kaangay airlines kag mga pasahero.
Mahibaluan nga magluwas sa take-off kag landing fees, ang New NAIA Infrastructure Corporation (NNIC) — ang private operator sang NAIA— natalana man nga sakaan ang passenger service charge sa masunod nga tuig kung sa diin ang nagikan sa P550 sa P950 para sa international departing passengers kag P200 naman sa P390 para sa domestic departing passengers.
Sa hanay ni NNIC General Manager Angelito Alvarez, ginsiling sini nga ang airfares nagadetermina sang revenue management strategies sang airlines kag indi lamang sang operational costs.
Ang NNIC ang ginakabug-usan sang San Miguel Holdings Corp., RMM Asian Logistics Inc., RLW Aviation Development Inc., kag Incheon International Airport Corp. kung sa diin nag-take over sa NAIA sadtong September 14, 2024.
