Ginsiling sang mga abogado nga nag-file sang petisyon sa kataastaasan nga hukuman ukon Korte Suprema nga indi pwede magtabok ang ‘impeachment trial’ batuk kay Vice President Sara Duterte sa manugsulod nga 20th congress.
Ini ang hugot nga ginsiling sang mga nagkalasambit nga mga abogado sa pagpanguna ni Atty. Israelito Torreon sang napamangkot ini kun ano ang sulod sang petisyon nga ila ginsumiter.
Pahayag sini nga indi pwede magtabok ukon mag ’cross over’ ang proseso sang paghusay sa masunod nga kongreso bangud sa ginasunod nga ‘legislative discontinuity’.
Nagapakita ini suno sa iya sang mga naka-pending nga proceedings sa kongreso nga magapabilin kasubong kag partikular sa isyu sang impeachment.
Si Atty. Israelito Torreon, kaupod ang pila pa ka mga abogado ang nag-file sang panibag-o kag dugang nga petisyon sa Korte Suprema agud punggan ang ‘impeachment’ batuk sa bise presidente sang pungsod.
Ginsumiter nila ang ‘supplemental petition’ kag ginpresentar ang tatlo ka punto sang paglapas sa konstitusyon hanungod sa pagpadayon sang impeachment trial.
Dugang pa sang nasambit nga abogado, ang pagtabok sang ‘impeachment’ sa panibag-o nga kongreso ang paglapas man sa kun ano ang nakabutang sa pagsulundan sang Senado.
Kun sa diin hugot nga ginhatagan sang pagtamod ang nakasulod sa Article 44, Section 123 sang Senate Rules ang ‘termination’ sa tanan sang naka-pending nga proceedings sa pagtakop sang 19th congress.
Ginpakigbahin man ni Atty. Israelito Torreon nga wala pa sang may natabo nga pagtabok sang isa ka naka-pending nga proceedings sang isa ka kongreso sa pagsulod sang panibag-o.
Siling sini nga ang tanan nga ‘pending matters’ ang gintapos na kaangay sang ‘impeachment’ kun ini ang ipadayon halin sa 19th congress pakadto sa pagsulod sang 20th congress.
