Ginpakigbahin sang talatapan sang Department of Environment and Natural Resources Capiz ang importansya sang pagtanom sang kahoy.
Sa interview sang Bombo Radyo kay Dr. Ernest Federiso, Provincial Environment and Natural Resources Officer sang Department of Environment and Natural Resources Capiz, iya ginpahayag nga ang mga kahoy ang nagaproteher indi lamang sa kabuhi sang tawo kundi subong man sa kabuhi sang mga kasapatan.
Suno kay Federiso, bangud nga ang Pilipinas masami nga gina-igo sang kalamidad, kinahanglan gid nga himuon sang masami ang pagtanom sang puno sang kahoy.
Magluwas sa mga pagbaha, nagakaeksperyensyahan man sa pungsod ang tuman nga kainit sang temperatura sa tion sang tag-init sa diin nga kun kaisa amo ang kabangdanan sa pagkadula sang isa ka kabuhi.
Nahibaluan nga ang ila nga talatapan nagapanagtag sang libre nga mga seedlings para sa mga may luyag magtanom sang kahoy.
Nagapasalamat naman ang natungdan sa mga Local Government Units sang probinsya sang Capiz, subong man sa Department of Education Capiz kag pila pa ka mga ahensya nga masami nagapangayo sa ila sang seedlings para sa tagsa ka mga ‘tree planting’ activities sini.
Nagapanawagan naman ang natungdan sa publiko nga kuntani, masami nga dumdumon ang pagtanom sang kahoy indi lang kay sa tion sang pagbaha ukon tag-init.
Interviewed by Bombo Saira Joy Alu-ad Bautista | via Zona Libre
