ROXAS CITY – “Dako ang amon pagsalig nga tani buhi pa si papa.”
Ini ang ginpahayag ni Alvin Duron, ika-duha nga bata sang missing nga si kagawad Alberto Duron, sang mainterview sang Bombo Radyo.
Suno diri, nagalaum pa ang bug-os nga pamilya nga makita-buhi ang ila amay bangud wala pa sang mga senyales nga ini ang patay kag may mga lugar pa nga wala nila natsekyar.
Dugang ni Duron, nag-untat man ang search and retrieval operations sang mga otoridad, maga-padayon sa gihapon ang ila pamilya sa pagpangita sa ila amay apisar limitado nalamang ang ila mga kagamitan.
Matandaan nga si Kagawad Alberto Duron ang nabilin nga missing sa naubon nga motorbanca sa Pob. Ilawod banwa sang Panitan sa paglaslas sang Bagyong Agaton.
Nagapanawagan man si Duron sa tanan nga mga pumuluyo, kun sin-o man ang makakita sa ila amay ang mahimo makapakig-angot sa ila pamilya ukon sa Panitan MDRRMO.
