ROXAS CITY – Nagpaguha karon sang statement ang pamilya ni Josephine Ramos ang ka-pangalan sang ginatudlo CEO sang double your money investment scam sa Barangay Libas sining syudad agud klaruhon ang pangalan sini.
Ginklaro sang anak ni Josephine Ramos nga wala sang anuman nga kahilabtanan ang iya iloy sa kontrobersyal nga investment scam nga ginareklamo sang mga investors sa Barangay Libas.
Ginpahayag sini nga wala naga-entra ang iya iloy sa anuman nga sahi sang investment scheme.
Yara lamang sa ila balay ang ginang nga isa na ka senior citizen kag wala nagaguha bangud sa COVID-19.
Suno sa anak ni Ramos nga indi man sini luyag nga kuhaan sang laragway ang nakapagkit nga litrato sang iya iloy sa barangay hall sang Barangay Banica nga nahibaluan isa ka miyembro sang Lupon.
Nahibaluan nga may pila ka mga indibidwal nga posible mga investors ang nagkadto sa ila balay matapos ang pangalan nga Josephine Ramos ang ginatudlo sang main upline nga si Anna May Barroa nga ginhatagan sini sang kapin P30 million nga investment money sang mga investors nga naglaum nga ma-doble ang ila nga investment.
Apang nadismaya lamang ang mga investors, matapos nga wala sila makabaton sang pay-out kag sa ila pag-atubangay sa barangay hall sang Barangay Libas ni Barroa, ginpanindugan sini nga iya ginhatag kay Josephine Ramos ang investment money sang mga investors.
Samtang nagalaum ang pamilya sang ka-pangalan ni Josephine Ramos nga sa ila nangin statement naathagan na ang mga investors nga ka-pangalan lamang sang iya iloy ang ginatudlo nga CEO sang double your money investment scam nga nakapang-biktima naman sang mga residente sa Barangay Libas.
