ROXAS CITY – Gin-aku sang utod sang Arcangeles brothers nga nadakpan sa drug buybust operation nga ginpatigayon sang PDEA-Capiz sa Sitio Tunga, Barangay Tanque, Roxas City, nga madugay na nila luyag ma-preso ang duha nila ka utod nga nagagamit sang iligal nga droga.
Sa interview sang Bombo Radyo kay Wilmar Arcangeles suno diri, madugay na nga problema sang ila pamilya ang pag-intra sa paggamit kag pagduso sang iligal nga droga sang ila utod nga sanday Wynel, 51-anyos kag Wally 38-anyos Arcangeles, nga amu ang subject person sang otoridad, kun sa diin nag-abot na sa punto nga ginplano na nila nga magpamilya nga ipa-raid sa mga kapulisan ang duha agud madakpan sa akto.
Gintinguhaan man suno diri nga pauntaton na sa iligal nga bulohaton ang ila utod apang wala sa gihapon nagapati, kag pati ang ila puloy-an ginhimo na nga drug den.
Dugang pa sini nga ini ang rason sa pagpadulong sa iban nga lugar sang iya ginikanan kag iban nga kautoran agud malikaw nga madalahig sa ila utod.
Sa karon, masakit man makita nga mapreso ang duha nila ka kadugo apang luyag sang ila himata nga mahatagan sang leksyon kag pabayran ang ila ginhimo nga iligal nga aktibidad.
Matandaan nga nadakpan man ang apat pa ka kaupdanan sang duha nga sanday John Acepcion, 25-anyos sang Brgy. Jumaguicjic, kag ginatudlo nagadul-ong sang iligal nga droga, Wyndel Arcangeles, 41-anyos paka-isa sang mag-utod nga Arcangeles kag ang duha nga naabtan sa hulot nga ginaalegar nagagamit sang iligal nga droga nga sanday Rone Baral 41-anyos sang Brgy. Lawaan, kag Korina Mantac 20-anyos sang Brgy. Milibili, nga ginpahayag nagpadulong sa lugar agud mag-utang sang kwarta para sa inugbakal gatas sang 4-ka bulan nga bata.
Nahibaluan nga nakuha sa ila posesyon ang 22 tanan ka sachets sang iligal nga droga, nga nagabug-at sang 20 gramos kag ginapahayag may market value nga P140,000.
