ROXAS CITY – Nagakasubo sa karon ang pamilya sang napatay nga piloto sa nagtibusok nga eroplano sa Mira Monte Village, Barangay Pansol, Calamba, Laguna.
Sa interview sang Bombo Radyo kay Anna Hernandez-Antioquia, utod sang napatay nga piloto nga si Captain Jesus Hernandez, tumandok sang Roxas City, subong gid lamang nila nga adlaw nahibaluan nga ang utod sini ang piloto sa nagtibusok nga eroplano kasunod sang pagpaguha sang pangalan sang mga biktima.
Indi ini makapati nga temprano pa nga kuhaon sang Makaako ang iya utod bangud natalana pa kuntani ini nga magselebrar sang iya kaadlawan sa Setyembre 25.
Mabudlay man apang kinahanglan nila magpakabakod ilabi na para sa nabilin nga tatlo ka mga kabataan sang iya utod.
Suno sa iya nga bata pa lamang sila, handom na sang iya utod nga mangin isa ka piloto rason nga kasunod sang iya pagretiro sa Philippine Air Force, ginduso sini ang iya handom.
Gindugang pa ni Anna nga preska pa sa iya paminsaron ang labing una nga kahigayunan nga nakasakay siya sa eroplano kun sa diin ang mismo utod sini ang nagserbi nga piloto.
