Nagapati ang pamilya sang senior citizen nga nasapwan-patay sa iya mismo puluy-an sa Sitio Bulon, Barangay Bilao, banwa sang Sapian nga ginkawatan kag ginhimuslan ang ila himata antes ginpatay.
Matandaan nga ginkilala ang biktima kay Dionila Doroteo, 71-anyos nga residente sang nasambit nga lugar.
Sa interview sang Bombo Radyo kay Nanay Jonaly, subang nga bata sang biktima, nagaisahanon lamang ang ila iloy nga nagaistar sa iya balay.
Nagahilibion sini nga ginpahayag nga indi nila mabaton ang makahalangusbo nga pagpatay sa ila iloy.
Pahayag pa sini nga antes natabo ang insidente, nag-ululupod pa ini sila nga nagtambong sa kaadlawan sang iya nga apo.
Ginpahayag pa sini nga sang Domingo sang gab-i ulihi nila nga nakaistorya ang biktima apang dako ang ila nga pagkatingala nga wala na ini nagasabat sa mga tawag kag text nila nga mag-utod sang masunod nga inadlaw.
Dako naman ang ila pagpati nga posible nga ginkawatan kag ginhimuslan ang ila iloy bangud sa nagalapta nga mga gamit sa balay kag wala na sang underwear ang amo nga tigulang kag ginsuksukan lamang ini sang short sang suspek.
Posible man suno diri nga naggamit sang matig-a nga bagay ang suspek nga ginlampos sa ulo sang biktima nga gintunaan sang kamatayon sini.
Sa karon, nagapadayon pa ang ginapatigayon nga imbestigasyon sang mga kapulisan angut sa natabo nga krimen.
