ROXAS CITY – Hustisya sa karon ang ginasinggitan sang pamilya Alvarez sa paglabo-patay sa biktima nga si Robinson Alvarez nga ginpatay sang wala pa makilala nga suspek sa ila puluy-an sa Sitio Tagudtod, Barangay Maninang, Sapian Capiz.
Suno kay Hazel Alvarez, anak sang biktima nga luyag nila nga matutukan sang kapulisan ang imbestigasyon sa pagpatay sa iya amay agud mapasabat sa suspek ang nahimo nga krimen.
Aminado si Hazel nga kun kaisa masakit ang mga tinaga nga nagakawas sa bibig sang iya amay, labi na kun madulaan ini sang ila hinuptan nga mga sapat.
Ginpahayag pa sini nga wala ini sang ideya kun sin-o ang yara sa likod sang krimen.
Ginpahayag naman sang pakaisa sang biktima nga si Eduardo Obligacion nga posible naigo ang suspek sa ginbuy-na nga mga tinaga rason ginpatay ang ila himata.
Samtang, nagapati si Obligacion nga posible temprano pa na natabo ang krimen bangud yara pa sa iya hawak ang tagub nga ginsudlan sang sanduko nga ginamit sa pagpatay sa iya.
Padayon naman nga ginapadalman sang mga otoridad ang ila nga imbestigasyon agud matumod ang suspek kag mahatagan sang hustisya ang kamatayon ni Alvarez.
