PANAY, CAPIZ- Ginpatpat sang Municipal Executive Senior Police Officer sang Panay Municipal Police Station ang mga accomplishments sang ila nga talatapan sa banwa sang Panay, Capiz halin Enero tubtob Agosto 2025.
Sa interview sang Bombo Radyo kay Police Executive Master Sergeant Dominggo Acepcion Jr., Municipal Executive Senior Police Officer sang Panay Municipal Police Station, iya ginpakigbahin ang mga accomplishments sang ila nga talatapan sa diin nga nagresulta sa pagpabilin sang palibot nga malinong kag matawhay.
Sa mga nanari-sari nga mga aktibidad nga ginpatigayon sang ila nga team, nakadakop sila sang 7 tanan ka mga wanted persons nga ginkalakipan sang most wanted kag other wanted persons. Nakadakop man ini sila sang duha (2) ka mga indibiwal nga naglapas sa Republic Act 9165 ukon “Comprehensive Dangerous Drugs Act of 2002”, isa (1) man ang nadakpan sa paglapas sa Republic Act 9287 ukon “Anti-Illegal Gambling Board”, isa (1) sa paglapas sa Republic Act 10591 ukon “Comprehensive Firearms and Ammunition Regulation Act” pamaagi sa pag-implementar sang Search Warrant.
Dugang diri, nakadakop man sila sang 31 ka mga indibidwal nga naglapas sa municipal ordinance partikular ang may kaangtanan sa Fisheries Law kag nakarekord man ang ila nga talatapan sang anom (6) ka mga surrendered firearms.
Pag-abot sa sitwasyon sang seguridad sang banwa sang Panay, yara sa maayos kag ordered nga kahimtangan sa diin nga ginakabig ini bilang isa sa matawhay nga banwa sang probinsya sang Capiz.
Bangud sa bulig kag suporta sang lokal nga gobyerno, mga barangay officials kag mga pumuluyo sang banwa, nagapabilin ang kalinong kag katawhay sa palibot.
Samtang, nagapadayon sa gihapon ang mga nagkalain-lain nga mga programa sang talatapan kaangay sang pagpanagtag sang mga informative pamphlets sa mga pumuluyo, pag-conduct sang symposium, kag baranggay visitation. Isa pagid ka programa ang sa karon nga ila ginapabaskog amo ang programa nga inisyatibo sang bag-o nga Chief sang Philippine National Police nga si Police General Nicolas Torre III nga 911 National Emergency Call sa diin amo ang pagpangayo sa ila sang bulig pamaagi sa pagpanawag gamit ang telepono ukon cellphone kag sa sulod sang lima ka minuto ila pagarespondehan.
Sa pihak nga bahin, isa sa dako nga problema ang sa karon nga ila ginahatagan sang hugot nga igtalupangod amo ang may kaangtanan sa traffic accident nga masami nagaluntad sa ila nga banwa. Samtang, pag-abot sa isyu sang iligal nga droga kag mga buluhaton, madamo sang mga tikang nga ginpatigayon ang mga kapulisan kaangay sang padayon nga pagpatigayon sang mga symposiums kag paghatag sang mga ihibalo para sa mga pumuluyo agud nga dalayon nga matapna ang kasubong nga mga buluhaton.
Pahayag pa ni Acepcion, pamaagi sa pagbinuligay sang mga otoridad, lokal nga gobyerno kag mga pumuluyo naagaresulta sa paging madinalag-on ang mga programa sang kapulisan.
Lauman naman suno sa iya nga magapadayon ang tanan nga mga aktibidad sang mga katapo sang Panay Municipal Police Station agud mapabilin ang kalinong kag katawhay sa palibot sang banwa.
In an interview with Bombo Francis Biñas & Bombo Sunnie Mae Batencila
