ROXAS CITY– Pilason ang 20-anyos nga panday matapos nga ginaalegar gintiro sang wala matumod nga persona sa Barangay Cala-agus, Mambusao, Capiz.
Ginkilala ang biktima nga si Mark Anthony Ventura sang Sitio Bungsi sang nasambit nga barangay
Sandig sa inisyal nga imbestigasyon sang Mambusao Municipal Police Station sa pagpanguna ni Police Staff Sergeant Ivan Camacho nagaguwa nga nag-inom ang biktima sa balay ni Charlie Loyola kaupod si Romeo Lacorte, 52-anyos residente sang Barangay Bungsi sang nasambit man nga banwa.
Ginaalegar nga naghinagaday ang tatlo ka mga persona nga liwat nga mag-inom sa isa ka tiyangge.
Apang samtang nagapauli na ang tatlo, hinali na lamang nga may nabatian nga lupok gikan sa wala matumod nga armas-luthang kun sa diin natukiban nga naigo na ang biktima sa natuo nga bahin sang iya nga tiyan.
Gilayon naman nga gindala sa Mambusao District Hospital ang biktima kag padayon nga ginabulong.
Samtang nagapadayon naman ang imbestigasyon sang mga kapulisan agud matumod ang responsable sa pagtiro sa biktima.
