ROXAS CITY – Yara na karon sa Roxas Memorial Provincial Hospital ang isa ka Locally-Stranded Individual (LSI) nga dugang nga nag-positibo sa coronavirus disease (COVID-19) sa banwa sang Jamindan.
Ini ang ginpahayag ni Mayor Mac Arthur Valdemar sang mainterview sang Bombo Radyo.
Suno kay Valdemar ang amo nga LSI ang naga-edad sang 54 anyos nga lalaki nga may naghalin sa Parañaque City, Manila.
Gindula man sang alkalde ang pagkahangawa sang mga pumuluyo bangud suno diri wala nakapauli sa ila balay sa Barangay San Vicente ang amo nga LSI.
Ini bangud sa municipal quarantine facility sang banwa lamang ini nagtenir.
Suno sa alkalde nga una nga nag-negatibo sa rapid test ang amo nga LSI apang sa ikatatlo ka adlaw sang iya quarantine period, nakabatyag ini sang pila ka sintomas kapareho sang pagpalangatol sang tutunlan, ubo kag hinalat rason nga gindala ini sa RMPH agud kuhaan sang swab specimen para ipaidalom sa real-time polymerase chain reaction (RT-PCR) test
Nagguwa sa resulta sang RT-PCR testing nga positibo ini rason nga gin-confine siya sa amo nga ospital.
Sa karon suno sa alkalde, estable na ang kondisyon sang amo nga LSI bangud wala na ini sang hilanat apang may ginabatyag pa nga ubo.
