ROXAS CITY-Nag-angkon sang patal nga pilas sa dughan ang Uitility sang Capiz Government Business Center nga nasapwan nga nagakulob sa kilid sang sapa sa Atila Balgos Avenue, Barangay Banica, Roxas City.
Ini ang ginkompirmar ni Police Lieutenant Colonel Joe Martin Fuentes, ang Medico Legal Officer sang PNP-Regional Crime Laboratory sang mainterview sang Bombo Radyo Roxas.
Ginpahayag ni Fuentes nga sandig sa resulta sang Post-Mortem Examination sa lawas ni Jonathan Caloyloy sang Tanza Norte, Panay Capiz, nagaguwa nga nag-angkon sang patal nga pilas sa dughan ang biktima tuga sang pagpangbuno.
Dugang pa ni Fuentes nga nagalab-ut sa kapin 13 sentimetros ang kadalumon sang nasambit nga pilas nga naglapus sa iya sini nga korason nga gintunaan sang hilaw nga kamatayon sang biktima.
Magluwas sang pilas sa dughan, nakita man sa resulta sang examination ang gasgas sa ulo sang biktima.
Samtang sa pihak nga bahin, ginkompirmar sang isa ka residente nga may yara ini sang nabatian nga nagpondo nga motorsiklo sang biktima antes natabo ang krimen.
Suno sa interview sang Bombo Radyo sa kay Maria Elena Abasiar Besana ginpahayag sang ginang ng nakabugtaw ini pasado alas 12 sang gbe matapos nga naglahay ang iya ido.
Ginpahayag sang ginang nga nakita sini ang tatlo ka mga menor edad nga nagalakat sa dalan nga nagliko sa direksyon sang Mckinley St.
Apang mga pila ka minutos ang nakaligad, nabatyagan sini nga nagpondo ang motor sang biktima kadungan sang pag-abot sang isa ka tricycle.
Gindugang pa sang ginang nga wala sini ginsapak ang amo nga hitabo bangud wala man ini sang may nabatian nga tingog.//
Apang tuman lamang ang kakibot sang ginpukaw ini sang iya nga bana bangud may yara sang presensiya sang pulis sa unhan sang ila nga panimalay.
Diri nakompirmar ni Besana nga may yara sang nasapwan nga lalaki sa amo nga lugar.
Sa karon, may yara na sang Persons of Interest ang mga kapulisan nga posible may kahilbatnan sa amo nga krimen.
