Gin-athag sang kapulisan nga patal nga pilas tuga sang pagpangbuno kag indi pagpanglabo ang gintunaan sang kamatayon sang isa ka 33-anyos nga lalaki sa Barangay Hilwan, Tapaz, Capiz.
Ginkilala ang biktima kay alyas “Totong”, isa ka mangunguma samtang, ang ginatudlo naman nga suspek ang ginkilala kay alyas “Baste”, 35-anyos kag lunsay mga residente sang nasambit nga lugar.
Sa impormasyon nga nakuha sang Bombo Radyo nagikan kay PMAJ Jhon Almarino N. Bonior, hepe sang Tapaz MPS, ginapahayag nga personal nga nagpadulong ang isa ka barangay kapitan sa ila talatapan agud ipabalhag nga may nagluntad nga pagpangbuno sa iya nga barangay.
Ginpahayag sini nga samtang nagakay-o ang biktima sang kanal sa iya nga uyapad, hinali nalang ini nga ginpalapitan sang suspek sa likod kag gulpi nga ginbuno sa magkatuhay nga parte sang lawas.
Dugang pa sini, sa imbestigasyon sang mga kapulisan, wala man suno diri sang nagluntad nga paglainay sang buot sang duha. Apang, nahibaluan nga ang suspek ang naga supreher sang problema sa iya nga pamilya kag posible amu ang rason sa pagbuno sini sa biktima.
Bangud sa natabo, nag-angkon sang wako (8) tanan ka buno sa likod, atubang kag pribado nga parte sang lawas ang biktima nga rason sang iya kamatayon.
Sa karon, yara na sa paghinakop sang Tapaz MPS ang suspek, matapos ini nga boluntaryo nga nag-surrender para sa nakaigo nga panumbungon.
