ROXAS CITY-I.Dead on arrival sa Bailan District Hospital ang isa ka senior citizen matapos nga aksidente nga nabungguan sang motorsiklo samtang nagatabuk sa dalan sa Barangay Linambasan, Jamindan Capiz.
Ginkilala ang biktima nga si Ruperto Vipinosa, 60-anyos residente sang nasambit nga lugar.
Sandig sa inisyal nga imbestigasyon sang Jamindan Municipal Police Station nagaguwa nga samtang ginasubay sang driver nga si Ronald Estanislao, 37-anyos residente sang Altavas, Aklan ang dalan, aksidente sini nga nabungguan ang biktima nga hinali lang nga nagtabok sa dalan.
Bangud sini, nag-angkon sang patal nga pilas sa ulo ang biktima nga gindala sa Bailan District Hospital apang gindeklarar nga dead on arrival sang attending physician.
Samtang ang driver naman nga si Estanislao ang boluntaryo man nga nagsungka sa mga kapulisan.
II. Patay ang 29-anyos nga mister matapos nagbungguanay ang motorsiklo kag pick up nga salakyan sa Poblacion-ilaya, Cuartero Capiz.
Ginkilala ang napatay nga si Alfonso Belonio, residente sang Barangay Ongol, Dumarao Capiz.
Sandig sa inisyal nga imbestigasyon sang Cuartero Municipal Police Station nagaguwa nga papuli na kuntani ang biktima sakay sa iya sini motorsiklo sang aksidente sini nga nabungguan sa likod ang ginsundan nga pick up salakyan nga ginamaneho sang wala matumod nga driver.
Bangud sini, natumba ang motorsiklo sa dalan kag kinalampos sini ang ulo sa semento.
Gindala pa sa Dao District Hospital si Belonio apng gindeklarar nga dead on arrival.
Sa karon nagapadayon pa ang imbestigasyon sang mga kapulisan sa amo nga insidente.
