Gin-ako sang punong barangay nga nagpatupa ini sang iya kinumo sang ikaduha ka beses sa isa ka residente sang barangay Candual, Panay, Capiz.
Suno kay Mabini Besana, Punong Barangay sang barangay Candual banwa sang Panay, ginpahayag sini nga indi man ini maghimo sang kasubong nga butang kun wala lamang sang rason.
Pahayag sang Punong barangay, may daan na ini nga hiligut-anon sa tunga nila sang amo nga persona.
Napungot na ang amo nga Punong Barangay bangud masami ini nga ginatulok sang masakit sang amo nga persona rason nga sang tion nga ato wala na sini napunggan ang iya nabatyag kag hinali ginpatup-an sang inumol si alyas “RR”.
Mahibaluan nga antes paman ang komosyon, gin-imbetaran ini sila sa birthday sang iya man nga barangay kagawad, kag ginpakaon ini ni kapitan Besana ang iya mga kaupdanan nga officials kag mga tanod , apang natabuan nga ato didto si alyas “RR” kag ginpahog ini sila nga pakan-on sang madamo nga bala.
Nagpangayo naman sang pasaylo ang Punong Barangay sa residente nga iya nasumbagan kag luyag man sini nga magpangayo man kuntani sang pasaylo si alyas “RR” sa iya agud mapabilin ang malinong ang ila nga barangay.
