Indi na kinahanglan nga magpadala sang warship ang Pilipinas sa West Philippine Sea (WPS).
Ini ang ginpahayag ni President Marcos kasunod sang panibag-o nga pagpang-harass sang Chinese vessel sa mga barko sang Pilipinas sa Bajo de masinloc kag Hasa-hasa shoal sa WPS.
Ginpunto sang Presidente nga indi makig-giyera ang Pilipinas sa China gani indi na kinahanglan nga magpadala sang warship ukon barko sang Philippine Navy sa ginakabig nga disputed islands.
Ginpahayag sang Presidente nga sa pagkamatuod ang Pilipinas ang masami nagapanubo sa lebel sang tensyon sa West Philippine Sea.
Sa karon ang ginahimo sang Pilipinas amu ang magpatigayon sang resupply kag rotation mission sa mga tropa nga naka-station sa BRP Sierra Madre kag subong man sa mga manugpangisda.
Nanindugan si President Marcos Jr nga indi mangin agent ang Pilipinas sang escalation ukon paglala sang tensyon sa West Philippine Sea.
Suno sa Presidente, kun usisaon ang kasaysayan kag progreso sang sitwasyon sa WPS, halin sadto wala nangin kabahin ang Pilipinas sa paglala sang tensyon diri.
Samtang sa bahin sang AFP, indi na kinahanglan pa nga mag-deploy sang gray ships sa WPS bangud may mga barko na nga nagapatigayon sang routinary maritime patrols.
Suno kay AFP Spokesperson Col. Francel Padilla, may mga navy vessels na nga naka-deploy nga nagapatigayon sang maritime patrols agud masiguro ang seguridad sa teritoryo sang Pilipinas.
