ROXAS CITY – Naglab-ot sa 9 ka mga medical patient transport vehicle ang nahatag sang Philippine Charity Sweepstakes Office (PCSO) sa probinsya sang Capiz subong nga tuig.
Ini ang ginpahayag ni Mr. Jeffrey Dela Cruz, Administrative Officer sang PCSO Capiz sang mainterview sang Bombo Radyo.
Suno diri, sang Marso una nga nakabaton sang 6 ka mga transport vehicle ang probinsya nga ginakalakipan sang banwa sang Sigma kag President Roxas, Roxas Memorial Provincial Hospital (RMPH), Mambusao District Hospital, Bailan District hospital kag Tapaz district Hospital.
Samtang sang nagligad naman nga Hunyo 22, 3 ka mga banwa sa probinsya ang nakabaton sang nasambit nga salakyan nga ginakalakipan sang banwa sangPanitan, Pontevedra kag syudad sang Roxas.
Dugang sini, may yara sang 3 ka requirements agud makakuha sang transport vehicle, ini ang Memorandum of Agreement (MOA), 3 in 1 form, kag request form, kun sa diin ginapasa ini sa Manila agud maprocess.
Mahibaluan nga Toyota high ace commuter deluxe ang model sang nasambit nga salakyan kag nagabalor ini sa 1.9 million pesos.
Dugang pa ni Dela Cruz nga kuntani magamit ini sang mga ospital kag makabulig sa mga pumuluyo.
Nagapasalamat man ang opisyal sa mga nagasupurta sa gaming products sang pcso.
Panugyan pa niya, nga padayon nga suportahan ang gaming products for charity kasubong sang lotto kag stl, bangud 30% diri ang nagakadto sa charity program ambulance donation, kag medicine donations.
