Ginpahayag ni PDEA 6 Regional Director Ralph Rommel Torres nga mas pagahatagan pa sang pagtamod sang Philippine Drug Enforcement Agency (PDEA) ang pagbantay sa illegal drug trade nga ginahimo sa kalalawran, labi na sa Western Visayas.
Sa interview sang Bombo Radyo, ginpasiguro ni Torres nga indi malipod nga magluntad man sa Western Visayas ang pagpalutaw sang bulto sang iligal nga droga, nga pareho sa mga narekober sa mga lugar sa Luzon kag Mindanao. Suno sa iya, isa ini ka seryoso nga isyu nga kinahanglan tutukan sang PDEA, labi na nga nagapadayon ang operasyon sa mga coastal areas.
Dugang pa ni Torres, nakigbahin ang Bureau of Fisheries and Aquatic Resources (BFAR) sa ila mga inisyatibo, kun sa diin naghiwat sang mga lecture kag aktibidad para sa mga fisher folks, partikular sa mga coastal areas. Ang mga seminar ini nagatuhoy sa pag-identify sang iligal nga droga kag paano makabulig ang mga komunidad sa pagpangita kag pagreport sang mga iligal nga aktibidad.
Bangud sang kalaparon sang kalalawran sang pungsod kag ang pagiging arkipilago, gin-ako sang PDEA nga isa ini ka dakung pagpanghangkat. Ang pagmonitor kag pagbantay sa mga baybayon kag dagat sang Western Visayas nangin mas komplikado tungod sa malapad nga teritoryo nga kinahanglan tutukan.
Sa pagpungko ni Torres bilang bag-o nga PDEA Chief sa Western Visayas, ginpahayag sini nga ila padayon nga pagahimuon ang mga kinahanglanon nga lakang para sa pagpatigayon sang mga operasyon batok sa mga durugista nga nagapadayon sa ila iligal nga mga transaksyon. Ginkumpirmar niya nga ang PDEA magahiwat sang mas madalom nga koordinasyon sa mga lokal nga komunidad kag mga ahensya nga may kalabutan sa marine law enforcement.
Lakip man sa plano ni Torres ang paghatag atensyon sa revalidation sang mga lugar nga nadeklara na nga “drug-cleared” sa rehiyon. Suno kay Torres, importante nga siguruhon nga ang mga nasambit nga lugar indi magabalik sa mga illegal nga aktibidad kag magpabilin nga malimpyo sa mga droga.
Ginalauman nga ang mga inisyatibo ini magahatag sang mas epektibo nga solusyon sa paglaban kontra sa illegal nga droga, kag magahatag sang proteksyon sa mga komunidad sa Western Visayas.
Reported by Bombo Francis Biñas
