Permit to carry firearms outside residence, temporaryo nga pagasuspendihon sa bug-os nga Capiz kadungan sang Capiztahan 2023

ROXAS CITY – Temporaryo nga pagasuspendihon ang Permit to Carry Firearms Outside Residence (PTCFOR) sa bug-os nga probinsya sang Capiz kadungan sa pagsugod sang Capiztahan 2023, buwas nga adlaw, Abril 13 tubtob sa Mayo 1, 2023.

Ini matapos nga naaprubahan sa Sangguniang Panlalawigan ang Resolution No. 360 ukon “Requesting the Philippine National Police to temporarily suspend the permit to carry firearms outside residence within the territorial jurisdiction of the Province of Capiz during the celebration of Capiztahan 2023.”

Tinutuyo sa sini nga resolusyon amu nga malikawan ang mga wala ginapaabot nga krimen, subong man para sa kalinong kag kahilwayan sang publiko.

Nahibaluan nga nauna na nga ginrekomendar ni Acting Capiz Police Provincial Director Jerome Afuyog, Jr., kay Governor Fredenil Castro ang nasambit nga suspensyon.

Agud mapasiguro ini nga kasugtanan, magapahamtang sang checkpoint ang mga otoridad sa bug-os nga probinsya.