Ginkilala sang Department of Labor and Employment (DOLE) Regional Office VI ang Public Employment Service Office (PESO) sang Provincial Government of Capiz bangud sa maayo sini nga performance kag kontribusyon sa paghatag sang serbisyo para sa mga job seeker kag mga mamumugon.
Sa pagpanguna ni Provincial Governor Hon. Fredenil H. Castro, nakabaton ang PESO Capiz sang pila ka pagkilala, lakip ang Regional Nominee sa Search for the Best Public Employment Service Office (PESO).
Ginkilala man ang opisina bilang Best Job Fair Implementer, Outstanding Achievement in Career Development Support Initiative Award, JobStart Implementer, kag Best GIP Implementer.
Nakuha man sang PESO Capiz ang pagkilala bilang Top Performing PESO sa PEIS Applicant/Job Seeker Encoding.
Samtang, ginhatagan man sang Service Award si John Leo Marco D. Beldia para sa iya 10 ka tuig nga dedikado kag maayo nga ehemplo sa serbisyo bilang PESO Manager sang LGU Province of Capiz.
Ginpahayag nga ang mga pagkilala nagapakita sang padayon nga panikasog sang PESO Capiz sa paghatag sang maayo nga serbisyo kag pagpalapad sang oportunidad sa trabaho para sa mga Capiznon.
Ginhatag ang mga awards sang Agosto 18, 2026 sa ginhiwat nga 2026 Western Visayas PESO Congress sa Iloilo Grand Xing Hotel sa Iloilo City.
Ang mga pagkilala ginakabig nga dungog indi lamang para sa PESO Capiz kundi para man sa Provincial Government of Capiz kag sa tanan nga nagasuporta sa mga programa para sa empleyado kag livelihood sa probinsya.
