Nagsugod na sa paghinun-anon ang Pilipinas kag France sa Visiting Forces Agreement (VFA) sa Paris subong nga semana.
Diri, ginpatigayon ang una nga hugnat sang negosasyon para sa amo nga kasugtanan nga ginalauman nga magatugot sa duha ka pungsod nga magpatigayon sang tingub nga mga ehersisyo militar sa teritoryo sang isa kag isa.
Suno kay French Ambassador Marie Fontanel-Lassalle, nangin madinalag-on ang paghambalanay kag tuman ka promising, kag suno sa iya, mahimo nga magdugay ang proseso bangud sa kinaiya sang negosasyon.
Gin-anunsyo man sang French Ambassador nga kon magdul-ong sa pagpirma sang kasugtanan ang pag-istoryahanay, ang France ang mangin pinakauna nga pungsod sa Europa nga may VFA sa Pilipinas.
Sa subong, ang Pilipinas may yara sang VFA upod sa iya madugay na nga kaalyado nga amo ang Estados Unidos nga ginpirmahan sang 1999, kag upod sa Australia nga gin-ratify sang 2012.
Sang nagligad lang nga tuig, ginpirmahan sang Pilipinas ang Reciprocal Access Agreement (RAA) upod sa Japan, nga bag-o lang nangin epektibo kasunod sang ratipikasyon sini.
Nagpirma man sang VFA ang Pilipinas sa New Zealand sang Abril kag sang damlag lang, natapos na ang negosasyon sa Canada.
