ROXAS CITY – Wala nagahatag sang kumpiyansa ang mga katapo sang Philippine Army (PA) apisar nagdeklarar sang duha ka adlaw nga ceasefire ang Communist Party of the Philippines New People’s Army (CPP-NPA) sumugod subong nga adlaw.
Sa interview sang Bombo Radyo kay Lt.Col Jay Javines, Public Information Officer sang 3rd Infantry Division Philippine Army, ang nasambit nga ceasefire ang kabahin sang obserbasyon sa pagmarka sang 55th anniversary sang komunista nga grupo nga natuon sa Disyembre 26, Martes nga adlaw.
Suno kay Javines, magapadayon sa gihapon sa pagpatrolya kag pagmonitor ang mga katapo sang PA pananglitan magpatigayon sang indi maayo nga buluhaton ang rebelde nga grupo.
Ini ang bnagud apisar nagdeklarar sang ceasefire ang CPP-NPA may pipila sa gihapon ang wala diri nagasunod kag nagatuga sang kinagamo.
Nagapati si Javines, nga propaganda lang ini sang grupo agud ipakita nga sinsero sila sa programa kag explanatory talk sang Philippine Army.
Sa pihak nga bahin, ginsiling sini nga nagtaas ang numero sang mga ginapahayag miyembro sang NPA ang nagsungka kag nagbalik sa sabak sang gobyerno kumparar sang nanligad nga tuig.
Pamatuod lang ini nga epektibo ang programa sang gobyerno kag matuod ang nagahulat nga bulig sa mga magatalikod sa hublag kag magabalik sa gobyerno.
