CAPIZ – Nangin organisado ang ginpatigayon nga deployment plan sang Philippine Coast Guard-Capiz kadungan sang pag-igo sang Bagyo Tino.
Sa interview sang Bombo Radyo kay Senior Chief Petty Officer Arnel Nisola, Chief Master at Arms sang Philippine Coast Guard-Capiz, iya ginpahayag nga may yara sang 14 tanan ka team ukon 112 ka mga katapo sang ila talatapan ang ginpang-deploy sa nagkalain-lain nga bahin sang probinsya.
Suno kay Senior Chief Petty Officer Nisola, apisar preparado man ang mga personnel, daku gid nga bulig ang pag boluntaryo kadto sa mga evacuation center sang mga pumuluyo agud indi na mastranded pa kag mabudlyan sang rescue sa tion nga magtaas ang lebel sang tubig.
Pahayag pa niya, wala sang may nabalhag nga casualty apang may yara sang gina-monitor nga insidente sa banwa sang President Roxas, Capiz kun sa diin may yara sang isa ka manugpangisda nga nagapabilin nga missing kag padayon nga ginapangita sang mga katapo sang Philippine Coast Guard.
Samtang, nagbalik na sa normal ang operasyon sang mga sakayan pandagat.
Nagapanawagan man ang natungdan nga maghalong ilabi na sa mga manugpangisda nga i-tsekyar gid ang mga sakayan pandagat antes nga magpalawod, mag dala sang cellphone para sa komunikasyon kag kun mahimo magpreparar man sang life jacket bangud sa indi mapaktan nga lakat sang panyempo.
Interviewed by: Bombo Jessa Mae Delos Santos vis Bombohanay Bigtime
