ROXAS CITY, CAPIZ – Ginasaulog subong nga adlaw sang Santa Iglesia Katolika ang Solemnidad sang Pagkatawo ni San Juan Bautista ukon ang “Solemnity of the Nativity of Saint John the Baptist.”
Bilang kabahin sang selebrasyon, nag-deploy sang mga personnel ang Philippine Coast Guard (PCG) sa kadagatan sang syudad sang Roxas agud masiguro ang seguridad kag safety sang mga pumuluyo nga magalangoy kag magpartisipar sa kapistahan.
Nahibaluan nga tuigan na nga tradisyon sang mga pumuluyo ang pagpaligo sa dagat kag ang fluvial parade bilang selebrasyon sa kapistahan ni San Juan Bautista. May pila man ka bahin sang barangay nga may pagbasyahanay sang tubig nga ginahiwat sa mga dalanon bilang kabahin sang kalipay.
Kaupod sang Philippine Coast Guard sa pagpatigayon sang seguridad amo ang mga katapo sang City Disaster Risk Reduction and Management Office (CDRRMO), Philippine National Police (PNP), Roxas City Emergency Response Team (RCERT), Community Emergency Response Team (CERT), Bureau of Fire Protection (BFP), Philippine Red Cross, Traffic Management Unit, kag Capiz Association of Community Action Groups (CACAG).
Suno sa PCG Roxas City, naghiwat sila sang baywatch kag seaborne patrol sa ila nagkalain-lain nga area of responsibility (AOR) agud madasig nga makaresponde sa anuman nga insidente sa baybayon.
Sa Barangay Baybay, Roxas City, nakig-upod man ang PCG sa ginpatigayon nga Fluvial Parade bilang kabahin sang kapistahan ni San Juan Bautista. Ang ruta sang parade naghalin sa Sr. San Juan sa Baybay, pakadto sa Punta Cogon, Culasi, Mantalinga, kag nag-agi sa People’s Park, kun sa diin ginpanaog ang patron pabalik sa Brgy. Baybay.
Samtang, ginpahayag ni Fr. Kim Carlo Dicon, Assistant Mission Priest sang Mission Station sang Hesus Nazareno nga daku gid ang pagtuo sang mga taga-Brgy. Baybay sa grasya nga ila nababaton paagi sa dunang manggad sang baybayon.
– With a report from Bombo Francis Biñas
📸Mayor Ronnie Dadivas/Facebook
