Handa na ang Philippine National Police (PNP) para sa patigayunon nga Traslacion subong nga adlaw nga ginalauman nga pagatambungan sang minilyon ka mga deboto ni Poong Jesus Nazareno.
Suno kay Acting PNP Chief PLtGen. Jose Melencio Nartatez Jr., wala na sang kulang kag kompleto na ang seguridad para sa selebrasyon, sa diin ginpahayag man sang hepe nga handa sila nga ipatuman ang anuman nga mga pag-adjust kun makita nga kinahanglanon.
Una diri, ginpahamtang ang pwersa sang kapulisan sa Quirino Grandstand bangud sa posible pagdagsa sang mga deboto .
Samtang may iban pa nga pwersa ang nadestino man sa Simbahan sang Quiapo para sa natalana nga misa subong nga antes mismo ang prosisyon.
Magluwas diri, nakalapta man ang mga pulis nga naka-sibilyan kag ang mga intelligence unit ang nagabantay agud malikawan ang mga insidente nga mahimo marekord kaangay sang pagpangawat kag iban pa nga sahi sang pagpanghimulos.
Samtang, nagdeploy man ang kapulisan sang mga police assistance desk agud mabuligan ang mga deboto nga nagakinahanglan sini kaangay sang mga senior citizens, persons with disabilities kag iban pa nga mga priority citizens.
