ROXAS CITY – Dismayado ang pila ka mga aspiring seaman matapos ginapahayag na-scam sang nagpakilala nga empleyado sang isa ka Maritime Company kag nagpahayag nga sarang makapasakay sa ila sa barko sa labing madali nga panahon.
Sa interview sang Bombo Radyo Roxas kay Ruzle Madriaga tumandok sang Pangasinan nga isa sa mga biktima, ginpakigbahin sini ang natabo nga pagpanunto sang iya nakilala pinaagi sa online nga si Darwin Valderama Degones kag nagpahayag nga empleyado suno diri sang Multinational Maritime Incorporated.
Suno kay Madriaga nga ginpromisahan siya ni Degones nga amo ang magapoproseso sang kinahanglanon nga mga dukomento agud mapadasig ang pagsakay sini sa barko kabaylo sang P43,000 bilang bayad sa mga galastuhon.
Wala naman sang pagpangduha-duha ang biktima kag gilayon ini nga naghatag sang nasambit kantidad bangud mapatihan ang mga ginpresentar ni Degones.
Suno pa kay Madriaga nga natabo ang transaksyon sa tunga nila ni Degones sadtong tinalikdan nga bulan sang Mayo sini nga tuig kag nagdugay tubtob sa una nga semana subong nga bulan sang Hunyo.
Ginkakibot ni Madriaga nga scam gali ang natabo sa iya matapos ini nga makabaton sang mensahe nagikan sa iban pa nga mga aspiring seaman nga nabiktima man ni Degones nga nagpadulong sa opisina sang Multinational Maritime Incorporated kun sa diin ginkakibot man sang nasambit nga kompanya ang natabo kag nanindugan nga indi nila kilala si Darwin Valderama Degones kag indi man nila ini empleyado.
Nahibaluan na lamang sang biktima nga nagikan sa Capiz si Degones gani nagdangop ini sa talatapan sang Bombo Radyo Roxas agud ipanawagan kay Degones nga ibalik ang mga nakuha sini nga kwarta kag ipahibalo ang modus sang nasambit nga scammer.
Sa pagpangusisa naman sang Bombo Radyo Roxas, nadiskubrehan nga anay napriso na si Degones sadtong Pebrero 2021 matapos ginserbihan sang warrant of arrest sang Panitan PNP sa mga kaso nga 2 counts of estafa kag 2 counts of Illegal Recruitment ukon paglapas sa Migrant Workers and Overseas Filipino Act of 1995 kag nangin casual employee man ini sang Provincial Disaster Risk Reduction and Management Office sang Capiz sadtong nakaligad nga tuig.
Samtang, magluwas sa nasambit nga biktima may nabiktima man ini nga mga taga-Cebu, Iloilo kag sa iban pa nga probinsya kun sa diin may nakuha ini nga masobra P200K kag plano man sang mga biktima nga magpasaka sang kaso batuk kay Degones.
