ROXAS CITY – Pagasuguran subong nga adlaw ang pagsarado sang pila ka mga dalanon sa syudad sang Roxas kadungan sang pagselebrar sang Sinadya Festival.
Sa interview sang Bombo Radyo kay Gonzalo Andrada, head sang Traffic Management Unit, iya ginpahayag nga magadugay ang pagsarado sang dalan humalin subong nga adlaw tubtob Disyembre 8, 2025.
Suno kay Andrada, ang pila sa mga dalan nga pagasaraduhan amo ang Rizal Street, Taft Street, Hughes Street, Washington Street kag Magallanes Street umpisa subong nga adlaw bangud sang nagkalain-lain nga event kasubong sang sigabong sa sinadya concert, grand sadsad sa sinadya, drum and lyre competition, prusisyon sang mga patron kag prusisyon sa suba.
Pahayag pa niya, mahimo nga magpamangkot sa mga katapo sang ila talatapan nga naka-deploy sa nagkalain-lain nga dalan sa syudad sang Roxas agud nga mabal-an ang mga alternatibo nga dalan nga mahimo agyan depende sa destinasyon.
Napangayo man sang gamay nga pag-intindi ang natungdan sa traffic kag hassle nga madulot sang mga aktibidad bangud ini ang parte sang pagpasalamat kag pagselebrar sa kapistahan sang Immaculada Conception.
Interviewed by: Bombo Francis Biñas via ZOna Libre
