Ginpakigbahin sang pila ka mga jeepney driver ang tuman nga epekto sang presyo sang gatong sa ila pang-adlaw adlaw nga kita.
Sa interview sang Bombo Radyo kay Wilfredo Opong, iya ginpahayag nga daku gid ang gin-iban sang iya nga kita humalin sa P2,000 , nahimo na lang nga P400 tubtob P600 sa kada adlaw nga kulang gid para sa iya nga pamilya.
Suno kay Wilfredo, ginakulang gid ang kita sini bangud magluwas sa pang-adlaw adlaw nga pagkaon, may maintenance pa ini nga kinahanglan baklon para sa iya ginasupreher nga balatian.
Pahayag pa niya, daku gid nga bulig ang pagrelease sang P5,000 nga fuel subsidy sa transport sector agud makapiyan-piyan sa pagbakal sang gatong.
Dugang pa sini, kun magpadayon ang pagtaas sang presyo sang gatong sa mga masunod nga semana, posible nga mag-untat na lang ini temporary sa iya nga pagbyahe.
Sa subong, nagalaum ini nga mabuligan sila sang gobyerno sa madali nga tion sa krisis nga gina-eksperyensyahan sini sa presyo sang gatong tuga sang padayon nga tension sa Middle East.
