ROXAS CITY – Indi pabor ang pila ka mga motorista sa 24/7 nga pagpangdakop sang Public Order and Safety Unit ukon POSU sa banwa sang Sigma.
Sa pagpakig-angut sang Bombo Radyo News Team kay Tatay Dennis, nagabyahe sang tricycle nga may ruta Amaga to Sigma, indi siya pabor bangud indi na normal suno sa iya nga nagalab-ot na sa gab-i tubtob kaagahon ang pagpangdakop sang POSU.
Dugang pa sini, nga kaangay indi na insakto nga duty kag suno pa diri nga suplado ang iban nga personnel sang POSU.
Apang, suno kay tatay Dennis, pabor siya sa pagpatuman sang ordinansa kun adlaw bangud nakit-an niya nga bisan pangayaw indi makaluwas kun may ginabayolar.
Mahibaluan nga 24 oras ang operasyon sang POSU sa banwa sang Sigma agud magpangdakop sang mga iligal nga naga-parking sa higad sang dalan kun sa diin sa oras sang gab-i madamo ang nabalhag nga nagakaladisgrasya bangud sa mga truckings kag dalagkuan nga mga truck nga ginahimo palahuwayan ang dalan sa amo nga banwa.
