DAO, Capiz- Amat-amat na nga naga-evacuate ang pila ka mga pumuluyo sang Barangay Poblacion Ilawod, Dao, Capiz, sa ila nga barangay hall kag pila ka mga evacuation centers kadungan sang malain nga tyempo nga dala sang Bagyo Tino sa probinsya sang Capiz.
Sa interview sang Bombo Radyo kay Punong Barangay Boboy Villanueva sang nasambit nga barangay, iya ginpahayag nga nagpatigayon na sila sang force evacuation sa mga residente sang ila nga barangay nga yara sa vulnerable nga area.
Suno kay Villanueva, may yara na sa subong sang 14 ka mga pamilya ang nag-evacuate na sa ila nga barangay hall.
Pahayag nya, hugot nila nga ginamonitor ang mga pumuluyo nga yara sa Sitio Pampang kag Riles bangud ang ini nga lugar ang tuman nga mabinahaon sa ila nga barangay.
Nagapanawagan naman ang natungdan sa mga pumuluyo nga iya nasakupan nga mag-evacuate na nga daan samtang timprano pa agud nga indi na maalang-alangan pa sa tion mismo nga ara na ang bagyo.
Interviewed by Bombo Francis Biñas
