Nagalaum ang pila ka mga tricycle driver nga indi lang one-time bigtime ang cash relief assistance nga ila nabaton.
Sa interview sang Bombo Radyo kay Reynold Dela Cruz, isa ka tricycle driver, iya ginpahayag nga daku gid ang pagpasalamat sini sa assistance nga iya nga nabaton gikan sa gobyerno.
Suno kay Dela Cruz, ang iya nabaton nga kwarta ang ginbakal niya sang gatas sang iya nga anak, iban pa nga kinahanglanon sa ila nga balay kag dugang nga tughong sang gatong.
Pahayag pa niya, daku gid ang kinalain sang kita sini sang una kun ipaanggid sa subong nga nagahatag sang kabudlay sa ila pang-adlaw-adlaw nga pagpangabuhi.
Nahibaluan nga nagpanagtag sang cash relief assistance ang national government sa idalum sang Department of Social Welfare and Development (DSWD) sa tanan nga mga lehitimo kag qualified nga mga tricycle driver sa syudad sang Roxas sang tag-P5,000 kada isa.
Nagapangayo man sang pag-intindi ang natungdan sa mga pasahero kag ginapaabot nga magahatag sang konsiderasyon sa pletehan bangud man sang padayon nga pagtaas sang presyo sang gatong.
