ROXAS CITY – Dako karon nga palaligban para sa pila ka residente sang Hernandez Avenue, Barangay 5, Roxas City kun paano ang ila mangin kahimtangan kun ipa-demolish ang ila mga balay sa nasambit nga lugar.
Ini matapos nga nagpapanaug sang notice of demolition ang City Engineers Office agud nga mapaguba ang nasambit nga mga balay nga yara sa kilid sang karsada.
Bangud ini sang nagapadayon nga road clearing operation nga mandatu sang Department of Interior and Local Government (DILG).
Suno kay Manang Aileen, isa ka residente, tubtob sa karon wala pa siya nakahibalo kun paano sila maga-umpisa liwat pananglitan nga gub-on ang ila balay bangud wala man sila sang kwarta nga gamiton para sa pagbakal sang mga kagamitan.
Ginpahayag naman ni Manong Reymund nga nakahanda man sila nga magsunod kun anuman ang mandatu sang gobyerno.
Apang nagaapelar ini sang pinansiyal nga bulig sa gobyerno sang siyudad agud may gamiton sila sa pagbakal sang mga construction materials.
Mahibaluan nga 47 tanan ka mga pamalay, pwesto kag carinderia ang ginalauman nga maguba sa amo nga demolisyon.
Hunyo 3 sang nabaton sang konseho sang Barangay 5 ang nasambit nga notisya kag sadtong Hunyo 5 ginpatawag ang mga residente nga maapektuhan.
Nasaad sa notisya nga may 15 diyas nga plaso ang mga residente nga mag-antad sang kapin 3 metros gikan sa right of way apang matapos naghinyo si Punong Barangay Lorilee Aguirre sa gobyerno sang siyudad, ginpalawig ang plaso sang tubtob 45 diyas.
