ROXAS CITY-Ginahulat na lang sang mga kapulisan sa banwa sang Pilar kun desidido nga magpasaka sang panombongon ang himata sang napatay nga biktima batuk sa driver sang truck sa natabo nga bungguanay sang tricycle kag truck sa Barangay San Fernando, Pilar Capiz.
Sa interview sang Bombo Radyo sa kay Police Corporal Helbert Dela Vega, Traffic Investigator sang Pilar Municipal Police Station nga ginahulat na lang sang mga kapulisan ang desisyon sang mga himata sang napatay nga si Sherly Vega, 59-anyos residente sang Barangay Binaobaoan sang nasambit nga banwa kun desidido ini sila nga magpasaka sang nakaigo nga panombongon batuk sa driver sang truck nga si Jonel Dalisay 39-anyos kag temporaryo nga nagapuyo sa Balasan, Iloilo.
Ginkompirmar ni Dela Vega nga naghatag man sang bulig si Dalisay sa napatay nga biktima kalakip na ang mga napilasan sa nasambit nga insidente.
Samtang padayon pa nga ginabulong sa ospital ang tatlo ka mga napilasan nga biktima nga nga sanday Ruthmar Villa, 47-anyos, Bernard Sarad, 26-anyos kag Ronald Nogoy, 22-anyos nga lunsay mga sakay sang tricycle.
Matandaan nga basi sa inisyal nga imbestigasyon sang mga kapulisan nga nag-overtake sa isa ka motorsiklo ang nasambit nga truck apang wala sini natalupangdan ang nagapadulong nga tricycle kun sa diin aksidente sini nga nasanggit ang tricycle nga ginkatumpilak sa dalan sang mga pasahero.
Ginapahayag nga nalapakan sang goma sang truck ang duha ka mga tiil ni Vega nga madasig man nga gindala sa isa ka pribado nga ospital sa siyudad apang gindeklarar nga dead on arrival.
