Padayon nga mabatyagan sa bug-os nga pungsod ang La Niña-like conditions tubtob sa bulan sang Marso suno sa Philippine Atmospheric, Geophysical and Astronomical Services Administration (PAGASA).
Ginpaathag ni PAGASA Climate Monitoring and Prediction Section chief Ana Liza Solis nga yara sa La Niña alert ang Pilipinas sumugod sadtong Hulyo sang tinalikdan nga tuig apang wala pa nalab-ot ang activity threshold agud magdeklarar sang La Niña season.
Dugang pa sini, sa ila nga forecast, may 72% nga tiyansa sang La Niña kag wala ginadula sang state weather bureau ang posibilidad nga malab-ot ang threshold sang La Niña sa mga masunod nga bulan apang posible nga indi ini masunod kasubong sang ginatawag nga full-blown La Niña nga mahimo nga magdugay sang anom la bulan ukon masobra pa.
Maobserbahan man suno kay Solis nga madamo sang naeksperyensyahan nga weather systems sa pungsod sa karon kasubong sang shear line bangud may kalakip suno diri ang La Niña nga mabaskog nga easterlies.
Gani pahanumdom sang bureau sa publiko nga indi magpakampante bangud madamo sang weather system pa ang posible nga magapaulan kag magatuga sang mga pagbinaha kag pagtiphag sang duta sa mga masunod nga adlaw.
