ROXAS CITY – Ginatos ka mga benepisiaryo sa banwa sang Pilar ang naka-ambit sang bulig kaina sa ginpatigayon nga medical mission sang Pinuno Partylist sa pagpanguna sang representante sini nga si Cong. Howard Ivan Guintu.
Dala sini ang mga doctor kag nurses amu man ang mga bulong nga ginpanghatag sa mga benepisiaryo.
Kadungan sini nagpanghatag man sila kaina sang educational assistance sa mga iskolar pinaagi sa opisina ni Board Member Jose Fulgencio ‘Pepe’ Del Rosario.
Matandaan ginsiling ni BM Del Rosario nga 2,000 ka mga iskolar ang makabaton sang tig-P2,000.
Padayon pa suno diri ang ila pagpanglista bangud madamo ang nagapadulong sa iya opisina agud magpasakop sa scholarship program sa idalom sang Pinuno Partylist.
Natalana buwas nga adlaw magapatigayon sa liwat sang medical mission sa Brgy. IX kag Loctugan Roxas City alas-8 sang aga.
Sa pihak nga bahin ginaduso man ni Rep. Guintu ang pabahay program para sa mga manunudlo kag nurses kun sa diin igapahamtang ang mga balay malapit sa buluthoan kag ospital, amu man ang mga pigado nga wala sang puluy-an.
Gintuad pa ni Guintu nga umpisa sang nagpungko siya bilang representante sang Pinuno Partylist, madamo na sila sang nabuligan nga buluthoan nga nahatagan sang sports equipment kag magabaton man sini ang pila ka buluthoan sa primiero distrito.
