ROXAS CITY – Ginkumpirmar ni Pinagkaisang Tsuper at Operator Nationwide (PISTON) Capiz President Mr. Jobert Carandang nga indi na sila mag-upod sa pagahiwaton nga untat-biyahe sang grupo nga manibela, sa Marso 6 tubtob 12, sa masunod nga semana.
Ini matapos nga ginpalawig pa sang Land Transportation Franchising and Regulatory Board (LTFRB) ang prangkisa sang tradisyunal nga jeepney tubtob Disyembre 31, 2023.
Sa interview sang Bombo Radyo kay Carandang, ginsiling sini nga dako nga kapiyerdehan sa mga magagmay nga operator ang programa sang LTFRB, kag ang manginpulos sini amu ang mga manggaranon nga negosyante nga yara sa likod sang pagdali nga mapatuman ang amu nga programa.
Mahimo man suno diri nga i-upgrade ukon i-rehabilitate ang tradisyunal nga jeep nga makasulod sa standard sang ahensya.
Panawagan ni Carandang nga tuldukan na sang LTFRB ang paghatag sang plaso sa traditional jeepney phase out, sa baylo, himayhimayon nila ang mga patakaran kag ipaintindi sa mga transport groups antes ipatuman.
