Hugot nga ginpakamalaut ni anay Bayan Muna Representative nga si Carlos Isagani Zarate ang report sang plano sang Estados Unidos nga magtukod sang mga pabrika sang bala sa Subic Bay, isa ka kilala nga anay base militar sang Amerika.
Ang desisyon ang nag-abot matapos nga ginmanduan sang U.S. House Committee on Appropriations sang Hunyo 16 ang ila mga ahensya sang gobyerno nga tun-an ang posibilidad sang pagtukod sang “joint ammunition manufacturing and storage facility” sa nasambit nga lugar.
Suno sa komite, kulang ang ila pasilidad para sa “forward-staged ammunition manufacturing” sa rehiyon sang Indo-Pacific, nga ginakabig nila nga kinahanglanon.
Nagpaandam si Zarate sa posible nga mga katalagman sang proyekto kag gintumod ini nga isa ka “magnet para sa inaway.”
Suno sa iya, ang pagpahanugot sa Estados Unidos nga magpatindog sang kaangay nga pasilidad sa Subic isa ka paglapas sa soberanya sang Pilipinas kag mahimo nga mabutang sa katalagman ang pungsod bilang isa ka potensyal nga target sang mga inaway.
Ginhangkat man sang anay kongresista ang administrasyon ni Presidente Ferdinand Marcos Jr nga ipakigbato ang isa ka “independent foreign policy” kag indi liwat magsunod sa luyag sang Estados Unidos nga magakompromiso sa seguridad kag soberanya sang pungsod.
