ROXAS CITY – Ginrekomendar ni PNP Chief Police General Guillermo Eleazar nga padayunon ang maayo nga imahe, katinlo kag ang pagserbisyo sa pumuluyo sang mga katapo sang Roxas City Police Station.
Ini ang ginpahayag ni Eleazar sang ini ang nagbisita sa syudad sang Roxas sang tinalikdan nga Oktubre 8, sini nga tuig.
Sa interview sang Bombo Radyo kay Police Lieutenant Colonel Aron Palomo, hepe sang Roxas City Police Station, nga malipayon man ini sa nangin obserbasyon sang PNP Chief sa iya paglibot sa ila istasyon.
Suno pa kay Palomo nga gindugang sang PNP Chief nga padayunon ang katinlo kag pagiging presentable sang istasyon, kag ginapabutangan sini sang atup ang parte sang police station nga magaserbe palahuwayan sang mga kapulisan nga nagatrabaho 24-oras.
Bangud diri, ginpasalig ni Palomo nga pagapadayunon sini ang katinlo sang Roxas City Police Station pati man sa kampo sang mga kapulisan.
Matandaan nga napili bilang best Component Police Station ang Roxas City Police Station sa bug-os nga Pilipinas.
